Skýr skilaboð í alþjóðlegu markaðsstarfi

Landsvirkjun kappkostar að bjóða núverandi og framtíðarviðskiptavinum sínum samkeppnishæfustu kjör í Evrópu í gegnum raforkusölusamninga til langs tíma. Stýranleiki endurnýjanlegrar raforkuvinnslu Landsvirkjunar veitir fyrirtækinu mikilvægt forskot á erlenda samkeppnisaðila sem almennt eru háðari duttlungum vinds og sólar og síbreytilegum aðstæðum á eldsneytismörkuðum. Raforkusölusamningar til langs tíma gera viðskiptavinum Landsvirkjunar kleift að minnka áhættu auk þess sem raforkuframleiðsla úr 100% endurnýjanlegum orkugjöfum hefur sífellt meira vægi hjá alþjóðlegum fyrirtækjum.

Landsvirkjun býður áhugasömum viðskiptavinum orkusamninga undir kjörorðunum „Orka til framtíðar“. Með því er átt við samninga á markaðsforsendum þar sem lögð er áhersla á eftirfarandi þætti:

• Samkeppnishæfasta orkuverð í Evrópu

• 100% endurnýjanleg orka

• Áreiðanlegir orkusamningar til langs tíma

Aukinheldur hefur krafan um að takast á við aukna losun gróðurhúsalofttegunda og þörf á orkuöryggi til frambúðar beint kastljósinu að endurnýjanlegum orkugjöfum. Breytt umhverfi hefur gert það að verkum að aðstæður á Íslandi eru orðnar ákjósanlegar fyrir ýmiss konar iðnað og hefur Landsvirkjun unnið að því að kynna Ísland sem hentuga staðsetningu fyrir alþjóðlega orkufreka starfsemi.

Nýir viðskiptavinir í kísilmálmiðnaði

Árið 2014 undirritaði Landsvirkjun samninga við tvo nýja viðskiptavini í kísilmálmiðnaði, United Silicon hf. og PCC.

Landsvirkjun gerði aukinheldur viljayfirlýsingar um helstu atriði raforkusölusamninga við nokkur fyrirtæki á árinu 2014. Stefnt er að því að klára þá samninga á árinu 2015 eftir því sem tækifæri og aðstæður leyfa. Landsvirkjun hefur einnig átt í viðræðum við fjölda annarra fyrirtækja sem verður fylgt eftir á komandi misserum. Alþjóðlegt efnahagsástand var betra á árinu 2014 en síðustu ár og fjölmörg fyrirtæki eru viljugri en áður að sækja fram. Spurn eftir raforkusamningum Landsvirkjunar er orðin meiri en framboð raforku og ljóst að á næstu árum mun Landsvirkjun standa frammi fyrir fjölmörgum tækifærum til aukinnar raforkusölu.

Endurskoðun samnings við Rio Tinto Alcan á Íslandi

Á árinu 2014 sömdu Landsvirkjun og Rio Tinto Alcan á Íslandi um breytingu á samningsbundinni orkuafhendingu sem endurspeglar betur orkuþörf álversins í Straumsvík. Forsögu málsins má rekja aftur til ársins 2010 en þá gerðu Landsvirkjun og Rio Tinto Alcan með sér raforkusamning sem nær til ársins 2036. Til að afla þeirrar raforku sem um var samið réðst Landsvirkjun í að reisa Búðarhálsvirkjun og Rio Tinto Alcan réðst í það verkefni að auka framleiðslu álversins og hefja framleiðslu á verðmætari afurðum. Sú framleiðsluaukning sem stefnt var að náðist ekki að fullu og álverið gat því ekki tekið við allri þeirri orku sem um hafði verið samið árið 2010.

Nýtt samkomulag Landsvirkjunar og Rio Tinto Alcan felur í sér þrennt:

• Raforkumagn í samningi Landsvirkjunar og Rio Tinto Alcan er minnkað sem nemur 35 MW.

• Rio Tinto Alcan hefur í nokkur ár möguleika á að endurheimta afl upp að því marki að aflnotkun álversins verði allt að 422 MW.

• Rio Tinto Alcan greiðir Landsvirkjun 17 milljónir Bandaríkjadollara vegna kostnaðar Landsvirkjunar sem fólst í því að fyrirtækið reisti Búðarhálsvirkjun fyrr en þörf krafði.

Breytingar á samningnum eru báðum aðilum til hagsbóta. Landsvirkjun öðlast aukna möguleika á raforkusölu og á sama tíma er möguleikum Rio Tinto Alcan til áframhaldandi vaxtar viðhaldið.

Aukin eftirspurn á heildsölumarkaði

Árið 2005 gerði Landsvirkjun orkukaupasamninga við heildsöluviðskiptavini sem gilda eiga í 12 ár. Samningarnir munu renna út í lok árs 2016. Á árinu 2014 vann Landsvirkjun að því að endurskoða og þróa nýtt form samninga og kynna endurbættar útfærslur fyrir viðskiptavinum. Fyrstu endurbæturnar munu taka gildi árið 2015.

Nýjar iðngreinar skapa aukna eftirspurn á íslenskum raforkumarkaði.

Aukin eftirspurn var eftir rafmagni á heildsölumarkaði 2014. Ástæðu þessa má ekki síst rekja til aukins fjölda gagnavera sem hafa verið að ryðja sér til rúms hér á landi auk þess sem fiskimjölsbræðslur hafa í auknum mæli verið rafvæddar á undanförnum árum.

Skerðingar á raforkuafhendingu

Raforkuvinnsla Landsvirkjunar grundvallast á veðurfari á landinu sem er breytilegt frá ári til árs og voru horfur í vatnsbúskap Landsvirkjunar allt frá haustinu 2013 og fram á árið 2014 lakari en mörg undanfarin ár. Sökum þessa nýtti Landsvirkjun sér samningsbundin skerðingarákvæði í samningum við orkukaupendur sem orsakaði að raforkusala fyrirtækisins dróst saman um 290 GWst samanborið við fyrri áætlanir. Nánari upplýsingar um skerðingar eru í kaflanum Orkuvinnsla 2014 og ítarleg umfjöllun um orkuöflun í lokuðu vatnsaflskerfi eru í kaflanum Hvað eigum við mikið af vatni?

Tenging raforkukerfisins við Evrópu

Árið 2014 var lagning sæstrengs milli Íslands og Bretlands eitt þeirra verkefna sem komst inn á tíu ára áætlun (Ten Year Network Development Plan) ENTSO-E, samtaka raforkuflutningsfyrirtækja í Evrópu. Einnig var verkefnið valið eitt af 100 áhugaverðustu innviðaverkefnum í heiminum af alþjóðlega endurskoðunarfyrirtækinu KPMG.

Lagning sæstrengs til Bretlands myndi opna á tækifæri til að nýta betur þau miklu verðmæti sem felast í stýranlegri orkuvinnslu sem erfitt er að nýta í einangruðu raforkukerfi eins og því íslenska. Orkuverð í Bretlandi sveiflast nær í rauntíma og er því til dæmis hærra á daginn en á næturna sem og á ákveðnum álagspunktum. Sæstrengur gefur þannig möguleika á að auka framleiðslu og selja orku þegar þörf er mikil og verð hærra. Að sama skapi er mögulegt að draga úr framleiðslu og kaupa orku frá Bretlandi þegar verð sveiflast niður. Sæstrengur myndi þannig bæta nýtingu auðlinda landsins, treysta orkuöryggi og draga úr rekstraráhættu orkuvinnsluaðila. Gerðar hafa verið fjölda rannsókna um lagningu sæstrengs og ávinning þess en rannsóknarskýrsla Hagfræðistofnunar Háskóla Íslands frá árinu 2013 benti þannig á að sæstrengur myndi gera beinan útflutning á raforku mögulegan og skapa um leið fjárhagslegan ávinning fyrir íslenskt samfélag.

Ítarlegri umfjöllun um tengingu íslenska raforkukerfisins við Bretland er að finna í kaflanum Sæstrengur.